وتيني الاخر ٥

وتيني الأخر ٥
اية وعلي نزلو .. علي كان متابع نجوان لما نزلت .. اتفاجأ لما شافها لأنو ما شافة ملامحها قبل كدة .
- ماشاءالله تبارك الله .. نسسخة من وجدان بس على ارقى شوية .
- اي بتشابهو شديد ماشاءالله .
- تعالي نسأل بتاع السوبر ماركت دة  اكيد عارف عنهم حاجة
علي واية تجهو علي السوبر ماركت ..
- سلام يا شاب
البائع
- وعليكم السلام الرحمة
- ناس العمارة الفوق دي .. ناس منو .. لأنو انا ضائع بفتش علي ناس معينين
- ناس العمارة دي دي ناس احمد ومحمد الاخوان .
- شغالين شنو ناس احمد ومحمد ديل .
- عندهم املاك خيالية وشركات .
- تشكر والله .
اية وعلي جو راجعين لي وجدان .. عاوزين يقولو ليها العرفوه فجأة جا عادل بتكلم بالتلفون مع صاحبو ، اية وعلي قعدو يتونسو عادي ووجدان اتدست بس فجأة عادل بقي يقول .." جوان الفقرية دي
انا ما بخليها .. حا اخليها زي المجانين لافة في الشوارع" .. وجدان اتصدما وفتحت عيونها وختت يديها الاتنين في خشمها . اية عشان كانت ظاهرة ليه عملت رايحة .. علي اشر ليهم نظام خليكم هادئين بس بقو يسمعو في باقي كلامو . " اسمع يا عمر شفت شقتنا الجديدة عاوزك تفتحها لي بعد 5  يوم بالتحديد يعني الثلاثاء الجاية عاوزة احبسها هناك ..يا انا يابت عمي دي "
وجدان في صمت دموعها بقو يجرو لا ارديا .. عادل فات واية وعلي جرو وجدان ساقوها الركشة وقالو للسواق دور امش بعد مشي بعيد من المنطقة وجدان بقت تبكي بأعلى حسها ..
- واااااي يا اية اختي في خطر.. يا اية اعمل شنووو وووب علي عاوز يضيع سمعت اختي ..
علي كورك فيها فجأة عشان يسكتها
- وجداااان ... اسكتي ياخ .. معقولة انت .. مستحيل اخلي اختك تتأذى .. 
- وااي انا لازم انبها .. لالا ودوني لي اختي اكلمها .
قالت ليها اية
- روقي يابت وما تتهوري لو مشيتي ليها حا تضيعي جهد 16  سنة .. روقي مخك وحا نمشي البيت نفكر في الموضوع ..
لما جو بشارع النيل علي وقف الركشة .. ونزلو وجدان استغربت
- في شنو يا علي ليه وقفتنا هنا ..
- عشان نفكر في الموضوع بي رواق وتهورك دة بضيعنا في ستين الف داهية .
- اها قعدنا .. وانا قلت ليك يا اية الناس المربنها ديل خطرين شديد ما بعيد يكونو هم الخطفوها .
- انا كمان حسيت كدة .. بعد كدة بابا لازم يدخل في الموضوع .
علي رد .
- خطفتيها من لساني ابوكم يعرف بالموضوع حالاً .. اختكم في خطر .
                                 ☆☆☆
نجوان للمرة الثانية دخلت البيت ودموعها عشرة عشرة .. قفلت باب غرفتها وقعدت تبكي .. كانت بتبكي شديد من اعماق قلبها بتبكي بي وجع شديد .. دموعها تنزل علي خدودها زي النار
بعد مسافة سكتت غسلت وشها وجابت تلفونها عملت مكالمة .. لي صحبتها قالت ليها انا جاياك اسي . نزلت تحت دورت عربيتها ومشت ليها ...
يلا صاحبتها دي ما من الجامعة اتعرفت عليها من هي صغيرة عرسوها ومشت بيتها .. وصاحبتها دي عارفة كل القصة انها ما بتهم وكدة .. لما وصلتها لقتها واقفة في الشارع مستنياها نجوان      نزلت من العربية وجرت عليها حضنتها .. وتبكي بشدة
- مالك يا جوان بسم الله عليك في شنو حبيبتي قلقتي بي ..
ردت عليها وهي بتبكي وشها احمر من البكاء
- عبير ..  اختي جات راجعة يا عبير .
- اختك منو ؟ .
- اختي التوأم يا عبير .. جات تسوقني معاها وانا ما عاوزة ارجع لالا ما عاوزة .
عبير اتصدمت لما سمعت كلامها وحاولت تهديها دخلتها جوا وجابت ليها موية وقعدت في السرير معاها لحد ما نامت ..
عبير اتصلت بي خالدة قالت ليها جوان بايتة عندها .
                                   ☆☆☆
الساعة 4 جات واية وجدان يادوبهم طالعين من شارع النيل وجدان من شدة الهم الشايلاهو علي اختها .. نست همها هي مع خالهم ..
ركبو المواصلات ومشو البيت الساعة 5   لقو عثمان قاعد مستنيهم في نص الهول ..
- كنتو وين يا سادة ؟
- اي كنا .. طلعنا للجيران .
- اممم انا ليه حاسي انكم بتكذبو علي .. وشوشكم دي منفخة كدة ليه .
ردت وجدان ..
- ما منفخة ساي بتهيئ ليك .. يلا يا اية نمشي غرفتنا .. عن اذنك يا خالو ..
وجدان ساقت اية من يدها ودخلت جوا وجدان زعلانة شديد من وصلت للسرير نامت لحد االساعة 9  مساء ..
بعد صحت رفضت تاكل ولا تشرب كل الفي لسانها كلمتين
- لازم انبه اختي .. انا لازم انبه اختي .
- اية قالت ليها خلاص يابت ما مشكلة بكرة حا نمشي ليها في الجامعة الاثنين نحاول نقنعها ليك
- وااااي يا اية .. بكرة الجمعة ..  احي يا قلبي اعمل شنو انا بجن لحد ما الاحد يجي ..
اتصلت وجدان بي مروة .. طلبت منها رقم نجوان مروة قالت ما عندها لكن بتحاول تجيبو ليها .. والخبر الاسوء منو انو ..
الاحد كمان قاب وما شغالين
 
وجدان بقت تبكي وتكورك بقت شبه مجنونة وتجري في الغرفة كلها واية تمشي وراها تحاول تهديها وكانت بتقول
- 3 يوم انا ما الاقي اختي اكلمها .. بجن يا اية بجن
- يابت انت اسي جنيتي ما شايفة تصرفاتك كيف .
وجدان كانت مستمرة في كلامها وبقت تنكش في شعرها .. اية لا اردايا ضربتا كف . بقت تكورك فيها ؟
- وجداااااان .. امسكي اعصابك حبة ياخ .
وجدان سكتت ومسكت خدها  بي يدها.. وبقت تعاين لي اية
                                  ☆☆☆
عدت الثلاثة يوم علي وجدان زي السم .. غبلها تاكل وتشرب واي شي مسيخ عليها .. لما جاء يوم الاثنين من شدة ما مستنية اليوم دة جرت واستحمت ولبست عبايتها حتى قبل خالها يفكر يصحى من النوم ..  مشت صحت اية ونزلت تحت خالها عثمان جا بالصدفة لقاها لابسة  عبايتها وقاعدة
- خير يا وجدان ماشة وين 6  صباحاً
ارتبكت وجدان شديد وبدت تتمتم .
- م م ماشة الدكان ..
- معقولة يابتي تطلعي براك .. عاوزة شنو انا بجيبو ليك .
- لالا والله حاجة بسيطة ما تتعب نفسك  
- وجدااااان
- عاوزة فرشة اسنان فرشتي ضاعت
- خلاص بجيبها ليك ..
وجدان رجعت الغرفة .. اية جهزت ليها الشاي قالت ليها
- عاد بالغتي .. لبستي قبل ابوي يفكر زاتو .. اسي امكن ما ماشي الشغل ..
شهقت خفيف كدة وقالت ليها
- انت جادة ابوك ما ماشي الشغل ..
- يابت بهظر طبعا ماشي ..
 
                                     ☆☆☆
وجدان واية مشو الجامعة زي الساعة 8  لقو عربية نجوان واقفة ..
جاية قبل المحاضرة ب ساعتين . وجدان قالت
- البنت دي اكيد خالطة .. جاية بدري كدة ..
- تعالي نفتش ورا القاعات . 
مشو يفتشو ها ورا القاعات ما لقوها بقو حايمين الجامعة كلها .. لما بدو يقلقو عليها .. بالصدفة شافوها قاعدة تخت شجرة في اخر ركن في الجامعة  مشو عليها .. شافتهم وجدان قعدت جمبها في الارض
- نجوان .. صباح الخير .
نجوان عاينت ليها مسافة وكانت عيونها حا تدمع . قبلت منهم ردت ليها
- صباح النور
- نجوان عليك الله اسمعيني في هدوء انا ما عاوزة الا انبهك انتي في خطر يا نجوان
- دي شنو الهبالة دي خطر كيف والقال ليك منو
وجدان عيونها دمعت بقت تبكي وقالت ليها
- ود عمك حا يضرك يا نجوان .. ما ناوي ليك خير ..
نجوان وقفت علي حيلها . وقالت في غضب
- لا انت اكيد مجنونة .. ود عمي مستحيل يضرني وبعدين انت عرفتي كيف ..
اية ردت ..
- عندك ود عمك طويل كدة سمعناها بقول يوم الثلاثاء وشقة ..
ما ناوي ليك الخير ..
- عاينو انا ما عارفة انتو عاوزين مني شنو .. والبتقولو فيه دة كلو كذب في كذب ..
نجوان قالت ليهم الكلام دة وقامت جاريه خلتهم واقفين .. لكن المرة دي ما مشت البيت
اية ونجوان طوالي اتصلو بي علي كلمو قالو ليها حجرت راسها
وابت تسمع الكلا ولا حتى صدقتهم .. قال ليهم خلاص ما مشكلة
هو حا يتصرف معاها .
                              ☆☆☆
نجوان مشت القاعة قعدت في اخر بينش براها .. قعدت تفكر في
في كلام وجدان .. لأنو هي اصلأ متوقعة ود عمها دة يضرها فعلا
حضرت محاضرتها وطلعت مشت البيت .. لاقتها امها
- جوان حبيبتي .. مالك جيتي بدري .. خير
- مافي حاجة يا ماما .. تعبانة وعاوزة انوم بس ..
- جوان يا بتي .. بالجد قطعتي قلبي الايام دي انت ما طبيعية         خالص .
جوان دخلت غرفتها وامها دخلت وراها .. قفلت الباب وقعدت في السرير جوان بعد غيرت كلابسها جات رقدت في رجليها ..
- ماما .. ليه كل الناس الفي البيت دة بعاملوني كعب ..
- من القال ليك كدة يا بتي جبتي الكلام دة من وين ..
- انت عارفة كدة  ماما حبوبة بتعامل احفادها كلهم كويس الا انا ..
ولا عشان انا ما بتكم ونفس دمكم ..
- يابت دة كلام شنو البتقولي فيه دة .. كيف ما بتنا .. اوعك تاني     تاني تقولي كدة بزعل منك .
نجوان سكتت وقعدت تفكر في كلام وجدان واية ..
                                    ☆☆☆
تاني يوم علي من الصباح جا وقف قدام بيت ناس نجوان ..
واية ووجدان اختها مشو الجامعة رسمو خطة وماشين عليها وكانت الخطة يراقبوها وين ما مشت اية وجدان في الجامعة وعلي يراقبها لما بتطلع الشارع ..
المهم نجوان طلعت من البيت ماشة علي الجامعة علي اتحرك بعربيتو وبقي ماشي وراها لحد ما وصلت ..   وجدان واية برضو واقفين ورها لحد ما حضرت محاضراتها وقعدت اتونست مع صحباتها وطلعت من الجامعة علي رجع وقف جمب بيت نجوان .. شافها لما دخلت .. في نفس الوقت كان متواصل مع اية وجدان
بالتلفون ..
زي الساعة 5  مساء جات عربية غريبة مظللة وقفت بعيد شوية من البيت .. علي كلم صاحبو جاهوو ..بقو واقفين مراقبين العربية ..
اية ووجدان في البيت بفكرو يطلعو ب اي طريقة ويجو لي علي .. قررو يكلمو عثمان انو طالعين لي صحبتهم ..
- بابا انا ماشة لي صحبتي من الجامعة .. في بيتهم حا نمشي انا ووجدان .
- خلاص تمام ما تتأخرو ساعة بس تجو تصلو المغرب هنا ..
- خالو عثمان احنا لما نصل..  المغرب بكون اذن ناخد لينا كلمتين مع الجماعة ..
- خلاص امشو المهم تجو بدري ما اتصل عليكم .
ما صدقو قامو جارين وصلو الساعة 6 لي علي .. صادفو نجوان    طالعة من البيت اتدسو ورا حيطة كانت ببتكلم بالتلفون سمعوها
بتقول .." عبير انا الليلة جاية ابيت معاك " ..
فرحت وجدان شديد وحست انو اختها اتصرفت صح ..
- الحمدلله خير ما فعلت .. انا كنت واثقة انو اختي ما حا تخيب ظني
رد عليها علي
- اختك لسة في خطر يا استاذة ما تفرحي تعالو نتابعها ..
مشو وراها كانت عاوزة تركب مواصلات هم استغربو وين عربيتها ..
في اثناء ما هي بتأشر علي العربات جات عربية واقفة جمبها سحبتها ومشت .. وجدان قعدت تكورك
- واااااااااااااااي اختي خطفوهاااااااااااااااا .
 
علي وصاحبو جرو جري ركبو عربيتهم  وتابعو العربية ووجدان
وايه ركبو ركشة وبقو متابعنهم وجدان داخت قربت تغمر ااية كل
مرة تصحصح فيها ..
- وجدان صحصحي .. وجدان اتماسكي حبة دة ما وقت تغمري فيه .. وجدااان
لما بتاع العربية وقف جمب مبنى تحت الانشاء كان عادل مستنيهم برة علي وصاحبو نزلو جرو عليهم . ضربو ضرب صح  جلد نضيف .. كانو 3  رجال..  السواق والراكب ورا مع نجون وعادل
اية و وجدان نزلو جرو لي اختهم في العربية لقوها غمرانا نزلوها
حاولو صحوها .. في المسافة دي علي اتصل بصاحبو في القسم جات عربات الشرطة لمتهم ومشووو .. وجدان قاعدة مع اختها في الارض اية جرت تجيب موية .. رشوها بيها فتحت شوية وجدان مسكتها حضنتها عليها شديد وبقت تبكي نجوان ما بين مفتحة وما مفتحة ... وجدان قالت
- نجوان حبيبتي انتى كويسة .. عليك الله ردي علي .. وااي ما يكون عملو ليها حاجة ..
علي قال ليها ..
- كدي قومي نرفعها نوديها المستشفى .
بعد كلام علي صحصحت شوية .. وقالت ليهم
- وجدان .. انا كويسة
وجدان فرحت عاوزة تطير من الفرح .. مسكتها ضمتها تاني
بدموع فرح شديدة .. نجوان عدلت قعدتها .. وبقت تعاين ليهم واحد واحد ... وقالت ليهم ..
- انت وجدان .. بس انتو ما عرفتكم ..
اية قالت ليها
انا بت خالك عثمان .. وانت بت عمتي سمية
اتفلتت على علي وقالت ليه ..
- وانت منو ما عرفتك
- حبيب اختك .. وجدان
- اقسم بالله كذاب ما تصدقي ..
نجوان ابتسمت لي اول مرة لي اختها .. وقالت ليهم
- شكرا ليكم.. بالجد شكرا ..
قالت ليها وجدان
- يابت بطلي عوارة .. مافي شكر انا نبهتك من اليوم داك بس راسك زي الحجر ..
- انا كنت ماشة ابيت عند صحبتي .. الليلة بس كانو اسرع مني .
- نجوان .. ما اشتقتي لينا يا نجوان ما عاوزة تشوفي اهلك .
فجأة ملامحها اتغيرت وشها بقي احمر من الغضب قامت علي حيلها سريع .. لما خلعتهم... وبقت تكورك فيهم قالت ليهم .
- لا ... ما تجيبو لي سيرة الناس دي تاني .. انا امي خالدة وابوي احمد غير كدة ما عندي اهل ..
وجدان استغربت شديد واندهشت من تصرفها .. قامت علي حيلها ..
قالت ليها .
- خلاص على راحتك اقعدي معاهم وما بجيب ليك سيرة تاني بس خلي علاقتنا حلوة عليك الله .. انا لي 16  سنة قلبي مقطوع عليك .. بحاول افتشك .. زمن الناس بكونو في المدرس انا بكون لافة في الشارع افتش فيك .. قلت امكن الاقيك ..  انا وانت توأم .. يعني قطعة مني نصي الثاني "وتيني الاخر" زي كاتبة في الصورة حقتنا بلاك انا حياتي ناقصة والله .
نجوان سامعة كلام اختها عيونها جرت دموع..  فتحت خشمها عاوزة تتكلم بس سكتت في اخر لحظة وجدان لاحظت ليها بس ما سألتها ..
نجوان مسكت وجدان من يدها وقالت ليها ..
- خلاص خير .. ما مشكلة . بنتلاقى كتير ..
قبلت علي ناس علي واية .. قالت ليهم .. وانتو كمان ..
وجدان ضمت اختها وبقت تبكي .. بعد شوية لاحظت انو الساعة 8 جات كوركت .
- واااي اية الساعة 8  خالو بقتلنا .. اجري اجري ..
علي قال ليهم
- خلاص امشو انتو انا بوصل الانسة لي .. ماشة وين انت .. وعارفك زي اختك ما بتركبي عربات خاصة حا نمشي
بالمواصلات وبجي راجع لي عربتي .
- خلاص تمام شكرا ليك .. راجعة البيت .
اية ووجدان جرو جري وصلو البيت الساعة 9    عثمان اتصل عليهم واهم جمب الباب ..  قالو ليه يفتح ليهم الباب
- اهلا اهلا .. بالسادة .. وين انتو للوقت دة
- عند صحبت اية .. بس انت عارف الناس لحوحين الا الشاي ووالعصير وانت عارف يعني .
- طيب يلا سريع عشان تجهزو لينا العشاء
اية وجدان مشو الغرفة قفلوها طبعا للأمان وكدة .
- غايتو شغالين كذب مبالغة الايام دي يا وجدان
- يابت اسكتي ساي ذنوب تقيلة الله يغفر لينا بس ..
- ان شاءالله .. اها حا تكلمي اهلك بعد كدة
- لا ... يابت انت ما شفتيها ملامح وشها اتغيرت كيف لما جبت     سيرة اهلي .
- اها مافهمت شي طبعا ..
- يابت انا متأكدة في حاجة حاصلة وانا ما عارفة بيها .. الزولة دي
علي الاقل مفروض تكون متشوقة انها تشوفهم .. حتى لو اتعودت علي ديل .. كان علي الاقل تقول لينا  فعلا اشتقت ليهم وكدة .. بس ما حصل كدة الحصل انها زعلت شديد . وما لاحظتي انها كانت عاوزة تقول حاجة وسكتت ؟
- فهمت عليك معناها في كتابنا دة في صفحة مفقودة .. لا نا لاحظت
- ما صفحة صفحات .. يلا بس ممكن نكلم خالو عثمان .. مع العشا رايك شنو نجيبها ليه حبة حبة بنقول ليه صادفت بت وحسيتها اختي وكدة .. امكن ذاتو نفهم منو حاجة
- خلاص تمام
فعلا مشو جهزو العشاء وقعدو كلهم في الصينية كل واحدة تعاين للتانية نظام ما عارفين يبدو الموضوع كيف . في النهاية اتوكلو على الله وبدت وجدان قالت ليه
- خالو عثمان .. عاوزة اقول ليك واحنا طالعين من بيت صحبتا
وعاوزين نركب جات بت مارا حسيتها دي .. نجوان اختي ..
- اي  يا بابا .. حتى ناديناها اتلفتت ومشت ..
- اي معناها اختي عايشة ما ماتت .
عثمان وشو اتقلب 180  درجة اللقمة بقي ماسكا في خشمو
بلعها بدون ما يمضغها وبغضب شديد .. وضرب يد الكرسي ..
- شنو هو عايشة وما ماتت .. اختكم ماتت زمااااان ليها 16 سنة ..
Alaa Sami