وتيني الاخر ٤اية صفقت ليها يديها نظام فخورة بيك
- ايوة دة الكلام المظبوط .. ياخ خليك وجدان البعرفها انا .. وانا معاك لي اخر لحظة .
- تسلمي حبيبتي انتي ربنا يخليك لي منعاها بكرة حانمش الجامعة حقتها ..
- خلاص تمام يا ستي ما عندك ااي مشكلة ..
- دقيقة اقول لي ابوي رسل لي مصاريف .. في اليومين الفاتو ديل انت دافعة قريب مليون والله .
- انت مجنونة .. اقسم بالله بزعل منك . عولاق انت ولا شنو ؟
يعني شنو نجوان كمان اختي زي ماهي اختك ..
- لكن ما برضو اسي ابوك لو سألك وانت عارفة قاعدين نطلع بالسر من وراهو موقفك حا يكون ما حلو .
- لا ابدا ابوي ما بسألني من مصاريفي نهاائي .. لأنو عارف بكون صرفتها ملابس بس .
☆☆☆
قامو الصباح جهزو شايهم وهو هو نفس الروتين .. بس استنو ابوهم يطلع وجري طلعو بي وراهو اتصلو علي مروة قالت ليهم عندهم محاضرة الساعة 10 جات حلوة معاهم لحد ما يحصلو
فعلا وصلو الجامعة الساعة 9 دخلو بأعتبارهم ضيوف مروة جات دخلتهم ..
- ازيكم كيفكم تمام
ردت وجدان
- الحمدلله تمام .. محاضرتكم الساعة 9 صح.. متأكدة انو جوان حا تجي ..
- ااي متأكدة بتجي شفتي من اصحابها يجو هي بتجي..
وجدان سكتت مسااافة وتعاين بأتجاه المبني قامت قالت لي مروة
- احكي لي عنها طبيعيتها كيف .. دراستها متفوقة او لا ؟ .. امكن انا البنت الوحيدة البسأل زول غريب عن اختي ..
- لالا عادي وانا معاكم والله في ااي شي . طيب يلا اختك متكبرة شديد مغرورة شايفة روحها شديد يعني الناس الزينا ما بتتكلم معاهم بتصاحب الناس الهاي هاي كدة . الدراسة شاطرة لكن ما شديد معدلاتها عالية بس ما اول الدفعة وكدة .. العارفنو عنها اهلها ناس جلابة غنيانين شديد . عندها عربية بتجي بيها كل يوم الجامعة ..
استغربت وجدان وقالت لي اية
- ديل منو ديل الربو اختي وادوها عربية ديل ؟
- ما عارفة والله .. ياهو كلامي حق اليوم داك .
تابعة مروة كلامها
- سمعنا انو حبيبها عاوزها قالت جاي يتقدم ليها .. كانت طوالي
قاشرة بيه .. الصراحة هو سمح سمح شديد قاطع عديل وباين عليه شخصية
قالت وجدان بأستغراب
- شفتي وين انت ؟
- يابت الجامعة كلها شافتو .. طوالي بجيها هنا ..
- اجي ؟ هي جاية تقرأ ولا تحب وتعشق وتتمعشق ؟
اية ومروة قعدو يضحكو .. قامت اية قالت ليها
- وين عربيتها .. ورينا ليها ..
- شايفة الشجرة ديك بتوقف فيها عربيتها مدام مافي معناها ما جات لسة .. لكن بتجي .
انتظرو اية ووجدان ومروة نص ساعة .. قامت جات داخل بعربيتها البيضاء .. وقفتها في مكانها المعتاد ونزلت .. طبعا كالعادة قاشرة لي اخر حاجة شياكة ما بعدها شياكة للنظارة الشمية خاتنها فوق الراس والبيبي هير مطلعنهم برا جات ماشة دخلت القاعة .
وجدان قالت .. وهي بتكعوج في خشمها
- غااااايتو .. فرق شاااااسع .. اسي في زول حا يصدق كارينا كابور دي يتكون اختي وكمان تومتي .. امي زاتو ما حا تصدق انو دي بتها خلي الناس .
اية ومروة قعدو يضحكو ضحك شديد قامت مروة قطعت ضحكتها وقالت ليها ..
- صحي تعالي هنا .. القصة شنو انا ما فاهمة شي ..
- انا ذاتي ما فاهمة حاجة .. فجأة اختفت في ظروف غامضة لما كان عمرها 4 سنوات .. امي قالت لي ماتت خطفوها وماتت .. يا حليلها امي ما عارفة بتها عايشة .. بس انا كنت مصرة علي انو افتشها والقاها احساس قوي كان بقول لي انها عايشة .. والحمدلله والشكر لله .. الله وفقني .
- ربنا يجمعكم والله ..
- اللهم امين عايني امشي احضر محاضرتك الزمن جا بتلقينا قاعدين .
- خلاص تمام
مروة مشت علي المحاضرة .. اية سألتها بفضول .
- وجدان اتخيلتك تقعي تاني لما تشوفي اختك ..
- سبب واحد يخليني اقع مافي .. اخير اكون هادئة كدة عشان اقدر افكر كويس الساعة 10 جات اسي . تعالي نقعد ع الكراسي ديك .
قبل ما يتحركو من تحت الشجرة اية لمحت نجوان طالعة .. لفتت وجدان . وبقو واقفين مراقبنها ماشة وين والمحاضرة بدت ..
المهم بقو ماشين وراها لحد ما وصلت البوابة .. جات عربية توسان فخمة شديد داخلة وقفت جمبها .. نزل منها ولد حلبي طوييييييل حلبي لابس اسود في اسود متحزم بالحزام ولابس نظارة سودة ..
نجوان سلمت عليه
اية اول ما شافتو اتخلعت ختت يدها في خشمها وفتحت عيونها زي قعر الكباية . وجدان عاينت لي اية وقالت ليها بهظار
- يابت عارفين الولد سمح .. لكن ما تعمليها ظاهرة كدة اقفلي خشمك دة ..
- يابت سمح شنو انت مجنونة سماحتو تطير.. دة افشل ولد في الخرطوم ..
- شنووووو .. كيف يعني ؟
- عديل كدة .. الزول دة لعووب بتاع بنات وقليل ادب .. بلعب بالبت فترة وبرميها عكس الهوا .
ردت وجدات بقلق شديد
- انت جادة .. بتعرفي من وين ؟ واسمو منو ؟
اية سكتت مسافة وبقت تعاين لي وجدان وبخجل قالت ليها .
- عشان .. عش عشان انا كنت واحدة من ضحاية الزول دة .. اسمو مؤيد
وجدان اندهشت واتفاجئت بكلام اية
- واااااااااي انت جاااااااادة ؟ اها والحل لازم اختي
تبعد منوو كدي تعالي نمش ليها.. ولا اقول ليك بمش براي عشان انت بعرفك مؤيد
قبل تتحرك من مكانها جات بت قالت ليهم
- واااي جوان مالك المات ليكم منوو .. لابسة عباية.. ومالو وشك .
ردت وجدان في غيظ شديد
- ماتت لينا حبوبتك .. وانت ما عارفة .. انا ماشة يا اية .
نجوان و مؤيد كانو قاعدين في المقاعد تحت الشجرة .. كبست عليهم وجدان قالت ليها بزعل وغضب شديد
- انت يابت قومي علي حيلك .
نجوان قامت مخلوعة طيرت عويناتا فوق لقتا دي البت القبل كم يوم ديك .. مؤيد وقف علي حيلو مخلوع قرب يجيه هبوط .. وبقي مبحلق ويعاين في وجدان مرة ونجوان مرة فسألها .
- جوان دي منو ؟
ردت عليه بي حنكشة
- تخيل انا كمان ما عارفة دي منو ليها كم يوم بتلاحقني .
وجدان في غضب ..
- هي يختي ان نسيتي اصلك وفصلك انا بذكرك .. انتي اختي انا واختي التوأم كمان وعندي صورة فيها انا وانت ..
- يابت انت بتستعبطي ولا شنو .. كيف اختك انا بنت واحدة عند امي وابوي ..
- امك وابوك .. امك سمية وابوك احمد يختي غير كدة ما عندك ام
واب .. وانا جاية من مكان بعيد وبرجعك معاي ما بخليك هنا كان كسرتي رقبتك ..
مؤيد واقف مصدوم وما فاهم حاجة حاسي بي روحو الاطرش في الزفة .. قال ليها .
- جوان حبيبتي ممكن تفهميني عشان تائه وما فاهم حاجة .
ردت وجدان بغيظ شديد
- تحبك الشكلوتة .. ما تدخل في موضوع ما بخصك انت اصلا الموقفك شنو انا عاوزة اتكلم مع اختي على انفراد .
الولد اخد بعضو وفات مشى زعلان نجوان كانت عاوزة تمشي وراهو وجدان مسكتها من يدها وقالت ليها
- اقيفي هنا ماشة وين انت .
نجوان فلتت يدها بغضب وقعدت تصرخ فيها
- مالك انت لاحقاني في شنو . انا ما بعرفك صح انت فيك ملامح مني بس ما عندي علاقة بيك ..
- للدرجة دي العز والقروش عمو عيونك يا نجوان .. للدرجة دي .. الرفاهية غيرتك .. صحي القرش بتعمل اكتر من كدة . انا مستغربة لي شنو ؟
اية جات لقت وجدان الدموع ملت عيونها عاوزة تنزل مسكتها من يدها وقالت ليها .
- اوعك تنزلي دموعك وتنكسري قدامها .. هي الخسرانة في النهاية
لأنو عمرو القرش ما بجيب السعادة .. انت قايلة كل الاغنياء ديل مرتاحين البال السعادة هي راحة بال ..
فجأة اية بقت تبكي ..
شوفي انا قدامك بيتنا 3 طوابق العاوزاهو بجيني لحد عندي .
المصروف الموفرو لي ابوي ما هين .. بتسمة رغم الوجع .. عشان كدة قايلاني سعيدة .. بالعكس .. البيت البدون ام مافيه سعادة يا وجدان . قروش الدنيا دي كلها ما بتحقق لي السعادة ولا بتغطي لي النقص الفي حياتي .. اختك انعمت بالقروش لكن انا متأكد انها ما سعيدة . وانا متأكدة حا تفهم يوم من الايام قصدي وترجع ليك .
وجدان اتأثرت بكلام ااية مسكتها وخضنتها .. اما نجوان لسة لابسة قناع التكبر والغرور .. قالت ليهم
- دة شنو الهبل البتعملو فيه دة ..
قامت مشت خلتهم واقفين . وجدان كانت عاوزة تلحقها اية مسكتها
- خليها .. انا متأكدة حا يجي يوم وتبكي تحت رجليك . بس اصبري عليها وانا وانت وراها للنهاية .
☆☆☆
نجوان دورت عربيتها وطوالي جرت بيها جري بسرعة عالية مشت البيت .. بيتهم عمارة طلعت غرفتها فوق . تبكي بكاء شديد جات امها قعدت جمبها وتمسح في راسها
- جوان حبيبتي ؟ مالك ياروحي في شنو دة منو الزعلك دة عشان امسح بيه الارض دي حالاً .
نجوان ما قدرت ترد بس بتبكي .وامها قاعدة جمبها ..
جوان ساكنة في العمارة دي ربوها خالدة واحمد واحدة ما عندهم اولاد نفس العمارة ساكنين اخو احمد واولادو .. عندو 3 اولاد كبار في عمر 29 و 27 و 28 كدة وعندو بت قدر نجوان اكبر منها بي سنة اسمها .. بالاضافة للحبوبة والجد قاعدين كلهم في العمارة دي .
جات الحبوبة الكبيرة اسمها ماريا .. وقفت وختت يديها في نصها زي يدين الجرادة . وقالت
- دي مالها الفقر دي بتبكي في شنوو ما ناقصين وجع راس احنا .
ردت خالدة .
- معليش يا خالتو ماريا .. بس شكلو في زول زعلها في الجامعة عشان كدة ..
- اها والبشاكلو في الجامعة بجي ببكي دة دلع زيادة عن اللزوم دة
فجأة مسكتها من يدها وبقت تجر فيها .
- يابت قومي عشان ما اخليك تبكي بسبب صحي صحي .
- خالتو ماريا خلاص .. الفيها مكفيها وهي كمان ما ناقصها وجع راس ..
- ما هو انت الخربتيها ودلعتيها .. لو كنتي بتديها بالجزمة على
راسها كان مشت عديل ..
خالدة ساقت نسيبتها ماريا وطلعو برة خلوها .. هي اخدت بكيتا
وسكتت .. بعد سكتت مسحت دموعها وغسلت وشها وغيرت ملابسها ونزلت تحت .. تحت ساكنين ناس عمها .. بي مرتو واولادو.. الكبير كان مغترب وجا ليه اسبوع .. من جا شغال لي نجوان حركات غريبة شديد .. المهم لاقاها في الممر قفل ليها الطريق .
- بعد من طريقي يا عادل ..
بقي بعاين ليها من فوق لي لي تحت فوق لي تحت وبي خباثة كدة .
- لو ما عاوز ابعد حا تعملي شنو .
قرب عليها ومسكها من يدها قربها عليه شديد .. نجوان شالت يدها وكف علي وشو خلتو يشوف طشاش طشاش .. فكاها قامت مشت منو بعيد وقالت ليه بغضب شديد
- ابقي راجل وعيد حركتك دي تاني يا كلب .
عادل اتحرق من كلامها شديد والغضب ملى عيونو.. بقي ماسك خدو بي يدو وواقف.
- اقسم بالله اخليك تشوفي نجوم الليل في عز الضهر وتحسبيهم نجمة نجمة .. قايلة نفسك منو انت عشان تضربيني كف .
☆☆☆
وجدان واية رجعو البيت زعلانين شديد علي تصرف اختهم دة ..
وجدان قالت لي اية للمرة الثانية .
- يا بت انت متأكدة مؤيد كان حبيبك زمان ولا مشبهة .
- كيف يعني مشبهة اجي .
- معناها رقمو عندك .
- قاعد ااي في الشريحة القديمة الا افتشها واجيبو ليك..
- خلاص تمام استعجلي بس .
اية مشت المطبخ تطبخ الغداء وجدان مشت الغرفة رقدت حبة تلفونها رن .. المتصل علي .. ردت وجدان سلم عليها وولاحظ انو صوتها ما طبيعي زي الحزينة او زعلانة كدة .. قالت ليهو مافي شي فجأة اتذكرت حاجة استئذنت منو ومشت لي اية في المطبخ .
- اية الحقي جاتني فكرة
اية خلت الفي يدخا كلو وجات تسمع الفكرة
- اها قولي افكارك العسل دي
- علي .. مش ضابط ؟ خلاص نكلمو يشوف لينا الناس الساكنة معاهم وجدان ديل منو..
- اممم فكرة كويس شديد بس عاوزة حبة تعديل .
- اها عدلي
61
- احنا ممكن نكلم علي بالموضوع .. بس ما عشان هو ضابط لا احنا بنكلمو كأنو صديق زول عادي . وانحنا ممكن نمشي بنفسنا نشوف ونسأل عن الناس العايشة معاهم وجدان ديل .. تمام
فرحت وجدان شديد وضمت اية بسعادة
- يابت انت ورثتي الذكاء دة منو بس وريني .
اية قعدت تضحك وقالت ليها
- عيب يابت كيف من منو .. خالك عثمان بي حالو ما ورثت منو .
- فعلا والله خالو لماااااااح والذكاء دة ينقط منو تنقيط
- خمسة وخميسة ما تسحري لي ابوي
- شوف العولاق دي عليك الله .. ارح اعملي الغداء دة سريع جعتا انا ..
رجعت وجدان واتصلت على علي رد عليها وقالت ليه انو هي فعلا متضايقة وكدة . وكانت عاوزة تحكي ليه علي التلفون .. بس قاطعها وطلب منها يتلاقو برا عازمهم الاثنين في مطعم ويعرف منهم الحاصل شنو .. اتفقت معاهو بكرة في اثناء الدوام .. وقعدو على كدة
☆☆☆
تاني يوم من الصباح .. اية قامت عملت طبيخها من الصباح وجدان رجعت اتصلت بي علي وقال ليهم انو حاليا في القسم . بس حا يطلع
الساعة 11 ممكن على 12 كدة يتقابلو مع انو الوقت متأخر لكن مافي طريقة يأجلو ااي شي والوقت ما في صالحهم لأنو فضل 20 يوم بس لي وجدان مع ناس خالها . قامو جهزو زي الساعة 10 علي 11 طلعو وصلو المطعم بعد نص ساعة .. قعدو شوي وجاهم علي..
- ازيكم يا بنات اخباركم .. شنو .
ردت وجدان
- الحمدلله تمام والله .. ممكن ندخل في الموضوع عشان ما عندنا وقت
- ياخ معقول اشربو حاجة علي الاقل بعدين نحكي .
- لالا .. ماعاوزين اي شي موية وشربناها قبل ما تجي ..
- تمام يا ستي يلا احكو ..
- انا اصلا جاية من مكان بعيد لمدة شهر عشان افتش اختي .. اختى التوأم .. واحنا ما حكينا ليك بصفتك ضابط لالا بصفتك صديق لينا .
المهم اختي التوأم لقيتا بعد 16 سنة مربينها ناس .. اغنياء شديد وانا حاسة انو اختي في وارطة كبيرة بس عاوزاك تمشي معانا نسأل عن الناس دي .. بقصد الناس القاعدة معاهم اختي .
- ايوااا ما عندك مشكلة حددي الوقت وانا معاكم ..
- بكرة ..
- خلاص تمام .. اها شفتي رصيتي كلامك كلو في كسر من الثانية
يلا تعالو اشربو عصير
- لااا بنتأخر لازم نرجع قبل اربعة
- انتو قصتكم شنو ترجعو قبل 4 دي المرة الفاتت قلتوها
ردت اية
- ابوي بجي 4 واحنا بنطلع بعد يفوت وبنرجع قبل يجي ..
- يا زولة ؟ انتو شغالين مجازفات معناها..
وجدان قامت علي حيلها وقالت لي اية
- يلا يا بت حا نتأخر .. الساعة 1 جات على فكرة .
طلعو من المطعم ركبهم علي ركشة ومشو البيت .. دخلو غرفتهم قفلوها عليهم .. وبقو يتكلمو
- ايوتة انا حاسة انو في سر كبير شديد في كونو اختى تتربي عندهم وصلتهم كيف ذااتو .. ؟
- وجدان مافي زول بقدر يجاوب علي الاسئلة دي الا نجوان نفسها .
- لكن نجوان الغبية نكرتنا كلو كلو .. ليه لكن نكرتنا .. معقول دة عشان القروش .. انا متأكدة انو في حاجة تانية ..
- الله اعلم وربنا يجيب العواقب سليمة يارب .
☆☆☆
اية وجدان طلعو يوم الخميس مشو السوق لاقو علي هناك ومشو
معاهو الجامعة اتصلو بي مروة وقالت ليهم اسي هي داخلة محاضرة ودي اخر محاضرة ليهم لليوم دة .. ودي جاتهم في الصميم مشو الجامعة ولحد ما جاهم علي المحاضرة فضل فيها ربع ساعة تخلص . قالت اية .
- تعالو اوريكم الخطة .
ردت وجدان
- قولي سريع عشان مافي وقت .
- طيب البنت دي لو خليناها علي مزاجها احتمال نقعد للعصر .. واحنا ما عندنا زمن عشان كدة امشي زي امس عكري مزاجها خليها تمشي البيت زعلانة .. وكدة بنقدر نتبابعها .. مسافة تعكري مزاجها انت يا علي جيب الركشة وتعال وما حاتتدفع ولا جنيه
قال ليها بهظار نظام مكاواة
- وانت حا تعملي شنو من الخطة.. تقيفي تتفرجي وتجي تركبي ونمشي .
- تصدق والله انت ذكي ياخ
- عارف ما تصفقي وتحرجيني ياخ .
ردت وجدان في غيظ
دة شنو العولاق البتعملو فيه دة.. يلا امشو طيب انا حا اقيف لي مروة هنا عشان اتصرف اطير ليها .. مروة طلعت من المحاضرة وجدان اشرت ليها قامت جات وجدان قالت ليها
- اسمعي راقبيها لي لما تكون بعيدة من الدفعة اتصلي علي .
- فيها شنو انت لو ومشيتي عادي
- عادي كيف انت مجنونة .. ولا شنو انت قلتي عارفنها واحدة عند اهلها وانا ما ... ما عاوزة اعمل ليها موضوع بين دفعتا يا مروة .. اختي مهما عملت بالنسبة لي دنيتي كلها .. يلا امشي عشان ما ابكي ليك هنا .
مروة تابعت نجوان لحد ما بقت براها بين صحباتها بس .. اتصرفت وبعدت عنها صحباتها بقت براها وجدان طوالي مشت ليها . نجوان من شافتها حاولت تمشي سريع بس وجدان كانت اسرع . طوالي مشت مسكتها من يدها .
- نجوان !! .. اسمعيني
نجوان بغضب ..
- انت حا تقعدي تلحقيني لي متين .. عاوزة مني شنو انت ..
- عاوزاك ترجعي لي اهلك لي امك وابوك واخواتك .
انفعلت نجوان وعلت صوتها زيادة
- انت مجنونة انا قاعدة مع امي وابوي .. اهلي كلهم في البيت .
فعلا حصل نفس توقعات اية نجوان زعلت ومشت ركبت عربيتها
وجري .. كانو اية وعلي وجدان متابعنها بالركشة .. لما وصلوها البيت .. علي قال ليهم
- وصلنا يا جماعة دة بيتها تعالو نقيف بعيد وانت بالذات ما تظهري .
Alaa Sami
الرئيسية