#قصة_قصيرة
#لاتحكم_على_الناس_بمظاهرهم
كتير مننا بهمه الشكل قبل اي شي تاني ومن الناس البتهمم المظاهر زولنا احمد ..
احمد طالب جامعي بدرس في الجامعة خلص الجامعة فكان بجي يقضي خدمة كان في 3 بنات صديقات معروفات في الجامعة انهم الثلاثة اصحاب برالمة .. بمشو وبجو مع بعض ..
احمد قرر يدخل على الشلة دي ويتعرف عليها .. هو طبعه زول مرح زول بشوش بحب الهظار والمظاااهر اهم شي دة غير انو زول مروق اهله ما مقصرين معاهو .. تلفون احدث موديل عربية اخر صيحة ..
فعلا دار الزمن ولف واحمد اتعرف على البنات الثلاثة احمد كان معجب بي 2 منهم شكلهم حلو وبنات ظاهرة فيهم النضافة والروقة والعز روان و ولجين ... ااما الثالثة ما كنت زيهم كانت انسانة بسيطة جدا جدا في تعاملها وفي مظرها وفي تصرفاتها كانت انسانة بسيطة من كل النواحي .. وكان قلبها ابيض انقى من اللبن .. اسمها الاء
- يا بنات رايكم شنو عازمكم الليلة
- وين عازمنا
- في كافتيريا (...) يا لجين
- طيب فكرة حلوة اها يا الوية حا تمشي معانا
- ياريت بس ما بقدر معليش
الاء كانت دايما ترفض انها تتمشور معاهم تحب ترجع البيت بدري روان ولجين اتعودو على الحاجة دي بس احمد كان ما بطيق وجودها بحس بيها زيادة عدد في الشلة كان تصرفاته معاها عكس تصرفاته مع لجين وروان كان في جفاف في التصرف بعكس تعاملها معاه كانت بتحترمو جدا .
- ياخ انت ما بتتعبي من انك تعزميها كل مرة احنا عارفين الجواب خلاص ماف داعي كل مرة نعزمها ..
- لا يا احمد في النهاية البت صحبتنا ..
- ما مشكلة يا روان مرة تانية باذن الله بطلع معاكم .. تسلم يا احمد ما قصرت والله ..
- لا العفووو
احمد وروان ولجين طلعو المطعم اتغدو هناك وكل واحد ومشى في طريقه ..
يوم عن يوم احمد كان بتقرب من لجين وروان وبحاول انو يبعد الاء عنهم كان كل ما تكون مافي بقول ليهم
- والله البت دي غلطة بس انت دخلتوها معاكم غلط ياخ شبه ساي ما بتشبهكم دي صاحبتوها كيف دي ..
كان دايما بحاول انو يحرجها قدام صحباتها ما لقت منه الكلمة الطيبة اصلا في حين انو ما بلقي منها الا الطيبة ..
يوم فاض بيه للنهاية وقرر يفاتحها بالموضوع مدام كل محاولات التلميح باتت بالفشل قال اخير اقول ليها عديل ..
- عايني يا الاء انا والله ما بطيق وجودك يعني بس لو سمحتى الربع ساعة البكون فيها مع لجين وروان دي تكوني ماف .. بس
الاء حست بأنكسار وضعف ما عادي حبست دموعها وابتسمت وقالت لي صحباتها
- طيب ما مشكلة انا حا استناكم هناك بعد تخلصو بتلقوني .
روان مشت معاها لحقتها
اما لجين كانت بتشاكل وتعاتب احمد ع تصرفاته مع الاء
اما احمد ما رف ليه جفن ولا هزت قلبو ولا اتحسس من تصرفاته العملها
الاء قدام احمد كانت بتبين انها قوية كنت بتظهر اللامبالاة لكن ما ان قبلت منو دموعها نزلو روان العبرة كانت خانقاها بشدة ما قدرت تتكلم مع روان ..
بعد فترة من الزمن احمد احتاج ليه دواء من صيدلية من الصيدليات الكبيرة مشا الصيدلية
واتفاجئ بوجود الاء في الصيدلية .. بس ما كانت بتشتري دواء او بتبيع انما كانت بتنضف الصيدلية
احمد اتصدم من الشافو بس عمل روحو ما بعرفها اصلا اشتري وطلع ولا حتى سلام ما اداهو ليها مشا قعد في عربيتو مصدوم وقرر انه يكلم صحباتها بالشافو ..
فجاة الاء طلعت من الصيدلية احمد تابعها لين وصلت بيت متواضع واقل من متواضع ..
احمد نزل من العربية اتجه على شباك الغرفة المطل على الشارع "كان مفتوح" وكانت فيه مرة كبيرة راقدة في السرير ..
الاء جات داخلة الغرفة قالت ليها
- يمة اصحى جبت ليك الدواء بتاعك ..
- جمعتي قروشو من وين يا بتي
- يمة ما تشغلي نفسك بالحاجة دي اتاكدي انو علاجك ح يصلك في الوقت المناسب بأذن الله .
احمد لا اراديا قعد يبكي على التصرفات الكان بعملها مع الاء حس روحه انو انسان حقير عكس ما كان فاكر نفسه انو مميز ..
طلع مشا البيت ما قدر ينوم بليل مستني متين الشمس تطلع والصباح يجي عشان يعتذر من الاء ...
فعلا الاء جات الجامعة ولاقاها احمد سلم عليها ...
قال ليها
- الاء انا عاوزك ضروري ..
- اتفضل يا احمد خير مالك ما تكون عندك مشكلة ..
احمد عاين لي الاء باعجب شديد وغلبو الكلام بعد شوية سألها
- الاء كان جا يوم احتجت ليك بسبب اني في مشكلة بتساعديني ..
- اكيد بدون شك
- حتى بعد العملتو معاك
- ما باخد في بالي بنسى انا هي الدنيا دي فيها شنو عشان اشيل من الناس ..
احمد دموعه ما قدر يمسكها قدام الاء وهي استغربت شديد فجأة بقى يقول ليها انا اسف يا الاء والله وانت اطيب واحسن زول اقابلو .. الاء على طيبتها سامحته وبقو احلى اصحاب ... كانت بتقيف معاهو في كل مشاكله وبقيف معاها ...
العبرة من القصة انو ما نحكم على الناس بمجرد مظاهرهم الخاريجية ..
القصة من #الخيال
Alaa Sami
الرئيسية
