#وتيني_الأخر (٢)
وجدان اللقمة بقت واقفة ليها في حلقها .. لا عرفت تطلعها ولا تنزلها .. اتوترت شديد في النهاية بلعت لقمتها وبقت تتمتم .
- اا اااا اطلع وين يا خالو .. هو متين وصلت عشان اطلع .
- ما عارف والله زي الشفتك الليلة ولا شبهتك ساي.
- ااي بكون شبهتني .
ردت اية
- فعلا يا بابا انا وهي اليوم كلو نتونس ونضحك .
- ااي فعلا بكون شبهتها ساي .. اها يلا يابنات تابعو الاكل انتو انا شبعان وبعدين عاوز اشتغل شغل بسيط كدة
- خالو كان تاكل لقمتين علي الاقل .
- اكلت الحمدلله .. صحة وهنا .
بعد عثمان مشى .. قالت وجدان
- واااي ابوك شافني .. الليلة سجمي وسجم خشمي ..
- فعلا والله تاني اعملي حسابك يختي ..
- كان شافك معاي ما بقول حاجة صح ..
- لالا ما بقول .. حتى لو شفناهو حانقول ليه .. طلعنا نعمل شوبنق ايزي الموضوع .
- خلاص تمام يلا نمش الغرفة .
اتصلت عليها امها تسلم عليها واتكلمت مع وعد ابوها لسة ما جا . بعد قفلت الخط قررت تنوم نومة خفيفة من تعب الليلة .. والنومة استمرت للصباح
☆☆☆
في صباح اليوم البعدو .. يوم الاثنين كررت وجدان نفس العملية العملتها امس .. لكن المرة دي طلعت معاها اية
- الحمدلله طلعتي معاي .. ما كان عرفت راسي من كرعي .
- طلعت معاك ما فاهمة حاجة حا نتجه وين اسي عشان اوديك .
قالت ليها في يأس شديد
- تصدقي ما عارفة .. تعالي نسأل بس بس .
جاءت الساعة 10 ولا نتبجة حتى الان لأنهم لافين ساي قالت اية
- انا جعت يا وجدان .. تعالي ناكل في المطعم دة .
- انا ذاتي والله .
مشو لي اقرب مطعم وطلبوا وجبات سريعة بعد خلصو من الاكل وجدان مشت تشرب موية .. بعد شربت عاوزة ترجع الكباية محلها وكانت فيها موية.. بالغلط الكباية وقعت والموية اتدفقت في فستان البنت الواقفة جمبها .. بقت البنت تصرخ علي وجدان بأعلى صوتها
- هييي انت مابتشوووووفي يا فقر انت .. اسي مليتي لي فستاني موية
وجدان طبيعتها ما بتحب زول يعلي صوتو عليها ردت ليها ببرود شديد
- اها ويعني شنو .. دي موية ما زيت عادي حا بتنشف .. وبعدين اوعك تعلي صوتك علي واضح
- حا تعملي شنو يعني ؟ .. اها بعلي .
- الحا اعملو ما اظن يعجبك عشان كدة لمي لسانك عليك .
فجأة وقعت وجدان في البنت ضرب شديد اية حاولت تحجز البنت من وجدان ما قدرت ... وكانت بتحنس فيها تخليها وجوطة قايمة مالية المطعم .. مدير المطعم اتصل بالامن او الشرطة 5 دقائق والعربية وقفت برا ساقو وجدان ولحقتها اية .
- هي انت موديني وين
الشرطي ..
- عاملة شغب وشكل في المطعم تفتكري حا نوديك الحديقة يعني ؟ .
- النبي بس مرقوني الليلة ما تحبسوني امي بتجن .
- انت وقت بتخافي علي صحة امك ضربتي البنت ليه .. ادعي انها ما تموت او اهلها يطفشوك في ستين داهية .
- لالا ما بتموت ما للدرجة دي .
- اسكتي خلاص حا تدخلي للضابط .. جوا
دخلت وجدان للضابط القي الشرطي التحية وقال ليه ..
- سيادة الضابط البنت دي عاملة شغب في المطعم .
كان الضابط مشغول بالتلفون وهو مقبل علي الشباك ، قفل الخط وقبل عليهم اتفاجأ بيها واقفة في نص المكتب ..
- انتي ؟ .. انت البت الكانت حا تتسرق امبارح ؟
وجدان كمان اتفاجأت بي انو دة بات مان حقها الامبارح
- ااي انا .. فرصة سعيدة اتلاقينا تاني .
- ومالك المرة دي عاملة شنوو .
- ولا شي مهم دقيت لي بت بس .
اية يادوب وصلت القسم ولقت وجدان واقفة مع الضابط .. وهي خايفة ترجف قالت ليه
- - معليش ياسيادة الضابط .. اختي دي بت هوجا ساي وما بتعرف تتصرف .. والله هي بت ناس ومحترمة بس ما بتحب زول يغلط فيها ..
ابتسم الضابط وقام من كرسيه وجا عليهم .. وبقي بعاين لي وجدان في عيونها
- متأكد من كدة .. ما بنعمل ليها اي شي ممكن تمشي البيت.. لكن تاني لو شفتك هنا .. بسجنك .
ركزت وجدان في ملامح الضابط وبقت تتبسم لا ارادياً
- تسجن منوو..
مسكت اية وجدان من يدها وجرتا عليها طلعتها برة القسم .. ملامح وشها متغيرة وزعلانة شديد قالت ليها
- اها اسي في داعي لي دة .. قربتي تورطينا مع ناس الشرطة .. معقولة بس .
- معليش والله ما قصدي يا اية بس تقولي شنو البت جابت اعصابي .
☆☆☆
قررو وجدان واية يرجعو البيت ، وجدان كل مرة بدأت تيأس دة اليوم الثاني ومافي اي نتيجة يلا هم في السوق كانت في بت وراهم بتنادي من بعيد . جوااان .. يا جواااان اقيفي يابت
انتبهت وجدان وقالت لي اية ..
- كأنو البنت قاصدانا .
- لا ما اظن بتقول جوان .
- كدي اقيفي النشوفها .
وقفو الاثنين وقبلو وراهم لقو البنت جاية عليهم .. قالت ليهم ونفسها قايم بسبب الجري
- انت انا جارية وراك من قبيل وانادي فيك مالك يابت .. طرشتي .
ردت اية مستغربة
- لا ما طرشت بس ما اتخيلتك قاصداني يعني .
- كدي خليك من دة مالك يختي لابسة عباية الليلة ما يكون في زول مات ليكم .
وجدان قبلت علي اية وقالت .
- دي مجنونة دي ولا شنو .. عمري ما لبست غير عبايات يابت .
قالت ليها اية
- بتكون شبهتك بس ..
- ااي بتكون ضايعة
البت بقت تعاين ليهم مستغربة شديد
- ضايعة كيف .. عرفناك مغرورة ومتكبرة لكن ما لي درجة تنكريني قدام الناس .. يلا سلام
مشت وخلتهم واقفين .. ما فاهمين حاجة .. قامو تابعو طريقهم
بعد دقيتين من البنت مشت فجأة وجدان صرخت ووخلعت اية
- وااااااي يا اية البنت قالت لي جوان .. معناها قاصدة اختي ؟
- لا اكيد بتهظري يا بت قالت جوان ما نجوان .
- ما عارفة لكن عندي احساس انو حا الاقيها هي حاسة كدة تعالي نفتش البنت دي مشت وين
شعرت وجدان بالامل انو حا تلقى اختها المفقودة ليها 16 سنة .. بقت ماسكة اية من يدها وجارية بيها يفتشو في البنت . لفو كل السوق ما لقوها .. قعدو تحت شجرة من التعب فجأة لمحتها عاوزة تركب الهايس
صرخت وجدان لما شافت البنت بأعلى صوتها ..
- واااااي اية عايني البنت ركبت الهايس .. الحقيها .
اية قامت مخلوعة بسبب وجدان والاثنين جارين يلحقوها بس الهايس اتتحركت في اخر لحظة ، بقو ينادو
- يابت ... انتي يالراكبة الهايس يا استاذة .
اية وقفت ومسكت وجدان من كتفها الايمن .. قالت ليها
- اسمعي يا وجدان بالطريقة دي لا حا نحصلها ولا حا نعرف شي اخير نركب ركشة نمشي وراها .. بس .
- ارح طيب مستنية شنووووو .
وجدان واية وقفو ركشة وبقو متابعين الهايس لما وقفت فجأة لي راكب عاوز ينزل حتى قدرو حصلوها .. نزلو من الركشة وقالو
للسواق
- عليك الله انتظرنا دقايق بس .
جرو على الهايس قبل يتحرك شافتهم البنت .. جوها بالشباك نفسهم مقطوع
- عليك الله عاوزنك دقيقة بس .
البنت استغربت شديد بس في النهاية نزلت قالت ليهم
- خير يا جوان مالك .
قالت ليها بلهفة
- اسمعيني انا ما جوان .. عليك الله وصفي لي شكل جوان .
- كذابة انت ماهي ؟؟ يا سبحان الله .. شفتي عايني لي روحك في المراية بس ياها جوان ذاتا - سكتت مسافة وتابعت كلامها - بسسس على ارقى شوية .. يعني مهتمية بروحها كدة ومكياج وتفتيح لون وما خلت ليها حاجة ما عملتها ..
- ماشاءالله .. لو ممكن توديني ليها..
- هي بتقرا معاي في الجامعة .. واحنا الايام دي مؤجزين لمدة اسبوع كدة .. لكن بسأل ليك عنها ..
فجأة قعدت وجدان علي الارض تبكي .. بشدة من عمق اعماق قلبها لأنها حست انو قربت شديد لي اختها .. اية قعدت معاها تحت ماسكاها .. بتاع الركشة نزل جا جاري والبنت مستغربة وواقفة قالت ليهم بأستغراب .
- يابت انت مالك بتبكي في شنو .
وجدان مسحت دموعها وقامت علي حيلها قالت لي البنت
- اسمك منو انت
- اسمي مروة .. وانت
- انا وجدان .. ودي اية اختي بنت خالي ..
فجأة اية قامت ناطة
- علي حس خالك يختي .. الساعة 2 ونص . فضل ليه ساعة ونص يجي البيت ولا بتكفينا ذاتو .
نططت وجدان عيونها واتفاجأت انو الزمن دة جرى سريع كدة مالو
- انت جادة ووب علي يلا البيت ..
قبلت علي مروة
- مروة معليش اديني رقمك عشان نكون علي تواصل .. ولو لاقتك ما تخلعيها .. عشان امكن تكون ماهي .. ال..
غلبها تكمل كلامها ورجعت تاني تبكي بس اخف من قبيل .. اية شالت رقم مروة .. وركبوها هايس .. ودفعوها ليها .. ورجعو هم ركبو ركشتهم .. وجدان في خوف بتقول لي سيد الركشة
- عليك الله اسرع .. علي سرعتك حبة بس .
وصلو البيت قبل الساعة اربعة بي ربع ساعة .. مع زحمة الخرطوم دي بعد مسافتها .. لما حو يحاسبو سيد الركشة
- اها بي كم المشوار
- ب 500
وجدان رفعت حواجبينها وشنكلتهم فوق وختت يديها في نصها زي خطرات العربية .. وقالت ليه
- 500 ليييييه وديتنا الصين وجبتنا ؟500 في شنووووو ؟
ردت اية
- يابت اهدي مشوار الخرطوم اصلا كدة .. بعدين احنا لفينا بيه كتير ..
- برررري يختي تاني كان نمش بي رجلينا ما نركب .. 500 دي بتجيب لي 3 عبايات .
اية والسواق قعد يضحكو علي كلامها .. قالت اية
- لحظة بس اطلع اجيبها ليك من جو واجي .
- تمام ما عندك مشكلة .
اية مشت تجيب ليه القروش وتجي لقت انو ما عندها غير 350 جابتهم وجات قالت ليه .
- والله ما لقيت الا دي 350 شيلهم وتعال بعد المغرب ابوي بكون جا اتم ليك الباقي .
قامت وجدان ناطة خطفت الكلام .
- تتمي شنو ديل ذاتهم كتيرات .
- الزولة دي جات الخرطوم الليلة الصباح ولا شنو .
- ااي جيت الليلة لكن ما الصباح بعد اذان الضهر .
- يا زولة .. خلاص تمام .. بس عشانك انت وصلتي يادوب . عفيناها ليك
قامت اية ناطة
- لالا يا اخ تعفي شنو والله ما مشكلة .
- يابت الحلال انا والله حرام علي اشيل اكتر من قروشي انا ساي كنت عاوز اخلعكم . لكن لقيتكم مساكين ولا حتى فاصلتوني .. ودة حقي المظبوط .
- تسلم والله
- ماشاءالله طلعت امين ..
- يديك العافية .
☆☆☆
دخلو اية وجدان استحمو واكلو لقمتين عثمان جا ختو ليه الغداء طبعا هم شبعانين . قال ليهم
- يا بنات مالكم تعالو اكلو ..
- اكلنا يا ابوي قبل شوية .
- الليلة خنتوني يعني صبرا .. بعملها ليكم .. بعدين انت ما طبختي
الليلة لأنو دة اكل امبارح
ارتبكت وبقت تعاين لي وجدان المرتبكة اكتر منها قالت ليه في توتر
- ااا اااي انا قلت ليها ما تطبخي عاوزة اتونس معاها لكن .. تاني حا نطبخ
- لالا تمام .. مالكم انتو ما عاجبني .. في شنو ؟
- مافي حاجة يا بابا بس فترانة الليلة ما نمت بالنهار عاوزة انوم .
- تمام امشو ما مشكلة انا بلم الصينية
ما صدقو البتين قامو جاريات .. طوالي كل واحدة استلمت ليها سرير .. وجدان قبل ما تنوم لقت مكالمة من امها سلمت عليها وعلي ابوها وعلي وعد واتطمن عليهم كلهم بخير.. قفلت الخط ورقدت نامت للساعة 8 مساء قامت شربت الشاي . وقعدت مع اية في التلفزيون . فجأة تلفونها رن لقتو رقم غريب ردت عليه
في البداية ما عارفت الصوت الا قالت ليها انا خالتك رجاء الكنت معاك في البص .. اتذكرتها وسلمت عليها .. وسألو عن احوال بعض ووخلاص قفلت الخط .
☆☆☆
تاني يوم الصباح وجدان واية قامو متأخرين لأنو اليوم دة هم ما
طالعين .. قامو من الصباح نضفوا البيت كلو وهم بيتهم طابقين طبعا عثمان مرووق شديد وياهو ما عندو غير اية .. ورفض انو يتزوج من بعد المرحومة ..
بعد خلصو نضافة قعدو في التلفزيون شوية .. قامت وجدان قالت
- ايه .. يابت البنت دي اتأخرت والله ..
- اتأخرت شنو يابت هي متين هو بتكون نايمة اسي .
- ااي صح .. لكن متأكدة او حاسة احساس قوي .. انو جوان ياها نجوان اختي .
- حذفت النون ولا شنو ..
انتبهت وجدان علي كلام اية .. ما كانت منتبهي ليه قبل كدة
- نجوان جوان ، نجوان جوان .. واااي ياهو بس بدون نون .
- جيبي حق الافكار حقتي ..
قعدت تضحك وقالت ليها .
- تستاهلي والله .. صحي نسيت اكلمك ..
- شنو .. اها احكي .
- الضابط السمح دة شفتيه سمح كيف
- سمح والله ..
- ياهو ذاتو الساعدني
- عليك الله انت جادة .. اممم عشااااااان كدة ..
☆☆☆
مضت يومين والحال في حالو مافي ااي جديد بس هم نفس الروتين قاعدين ياكلو ويشربو يتونسو وينومو .. يلا بعد جهزو الفطور كدة وختو في الصينية .. اية قعدت .. وجدان قبل ما تقعد علي الصينية سمعت رنة تلفونها قاعد علي كرسي الجلوس
- دقيقة يا اية تلفوني بضرب اشوفو
- طيب ما تتكلمي ردي قولي ليه عاوزة اكل وتعالي .
مشت وجدات رفعت تلفونها من الكرسي عاينت للرقم .. لقتو ..
- واااااااي يا اية تعالي
- اية في شنو بسم الله
قامت جارية جري علي وجدان
- الحقي يا اية دي مروة .
- اها ردي .. طيب مستنية شنو .
ردت اية علي التلفون لأنو وجدان غلبها ترد خايفة انو تقول ليها مافي طريقة تشوفيها او كدة . بس اية كانت بتتكلم معاها وجدان متشوقة تعرف مروة بتقول في شنو 5 دقايق وقفلت الخط
- اها يابت قالت شنووو سريع وريني .
- قالت بكرة تعالو منتزه (..) عاملين قعدة للدفعة .. وجوان جاية .. القعدة الساعة 10 بتبدأ
من شدة فرحها قعدت تبكي وجدان .. وحست انو خلاص قربت شديد لي اختها .. لكن خايفة انو يصيبها خيبة الامل وتطلع ماهي المقصودة .. الفكرة دي عاملة ليها قلق وتوتر شديد ..
الاكل في الصينية برد وما لقي زول ياكلو وجدان من الفرحة شبعت واية رفضت تاكل براها ..
اتصلت علي تلفون امها واتكلمت مع وعد اختها .. وحكت ليها كل التفاصيل .. ومشو الغرفة ، وجدان كانت متشوقة متين الصباح يجي تحسب فيه بالساعة والدقيقة .
☆☆☆
فعلا الصباح جا وجدان صحت قبل النباه وغلبها تنوم تاني فرشت مصلايتها واتوضت وجات صلت الصبح وبقت تدعي انو طريقها يتسهل وتلقى اختها .. بعد خلصت دخلت المطبخ حضرت الشاي .
خالها جا من الجامع لقاها حضرتو .. كبت ليه الشاي وقعدت جمبو
- ماشاءالله الليلة يا وجودة .. النشاط دة جا من وين .
قعدت تضحك وقالت ليه مبسوطة
- ان شاءالله دايما اكون نشيطة كدة احضر ليكم الشاي اها ما قلت لي رايك شنو في الشاي دة .
- ولا كلمة .. شاي حلو زي ستوو .
- تسلم يا خالو ..
اية صحت من النوم متأخرة شوية لقت ابوها اتظبط خلاص وطالع الشغل ..
- بابا ماشي وين بدري كدة .
- ما بدري يا روح بابا بس انت الليلة النوم سرقك .
- طيب دقيقة اشرب الشاي 5 دقائق ويجهز
- شربتو الليلة وجدان عملتو لينا .
- اها .. والله ماشاءالله .. خلاص تمام يا احلى بابا في الدنيا ..
اية مشت علي الحمام لقت وجدان طالعة منو لابسة ومتجيهة .. وجدان اول ما شافت اية مسكتها من كتوفها ودخلتها الحمام
- اسرعي استحمي سريع لحد ما تطلعي بتلقي الشاي جاهز عشان ما نتأخر .
- دقيقة اصبري .. قالو الساعة 10 ما سبعة صباحاً .
- انا بموت لحد 10 ما تجي .. ياخ انا امس ما نمت لحد الواطة تصبح ، سريع استحمي ونطلع ان شاءالله كان نقعد في المنتزه ساي بس .
- خلاص تمام .. يلا
وجدان مشت الغرفة لقت مكياج اية في التوليت عملت مكياج خفيف
اية جهزت وشربت شايها وطلعو مشو المنتزه من 7 صباحا بقو مستنين ، الساعة 10 لما جات وجدان اتصلت بي مروة قالت ليها وين انتو مروة قالت ليها جاين في الطريق .
زي الساعة عشرة وربع وجدان شافت ليها مجموعة كبيرة من الناس .. مشت عليهم وقفت بعيد شوية لمحت مروة من بعيد بلعت ريقها وقالت لي اية
- اية انا جسمي بدا يرجف .. تعالي ارحكي نقرب منهم
- خلاص تمام يلا .
قربو عليهم فجأة شافوو ...
Alaa Sami
الرئيسية