#وتيني_الأخر (٦)
اية ووجدان مخلوعين من ردت فعلو .. قامو لمو الصينية الاصلا اكلو منها لقمتين بس سريع سريع ودخلو الغرفة قفلو الباب بقو محتارين في ردت فعلو شديد حتى كانت الخلعة اكبر من انهم يزعلو ويبكو .. وجدان قالت
- لالالا .. انا كدة اتأكدت انو في حاجة ما مظبوطة ..
- تصدقي انا ذاتي .. ما الحمدلله المااستعجلنا وكلمتي اهلك ..
- ااي والله .. اسي انا ذاتي محتارة وراسي اتشطب نهاائي ..
لكن انت عارفة .. في طريقة واحدة بس . كان فشلت نقنع من الموضوع
- طريقة شنو دي
- وعد اختي .. نكلم وعد اختي تحاول هنا تفتش تعمل ااي شي المهم تتصرف تطلع لينا بي حاجة .
اتصلت بي اختها وكلمتها انو بي نجوان وانو ما تكلم امها وابوها .. حكو ليها كل التفاصيل .. وعد قالت ليهم خلاص بتحاول تفتش هنا
عسى ولعلى تلقى ليها حاجة تساعدهم بيها .. وقفلو علي كدة بعد كدة .
☆☆☆
نجوان طبعا رجعت البيت طوالي جري علي غرفة امها .. قفلت الباب امها لما اتخلعت ..
- في شنو يابتي ومالك جيتي راجعة .
- عادل الحقير الواطي اختطفني يمة وكان ناوي يعتدي علي .. واسي هو في القسم
خالدة من الصدمة نست عادل دة منو زاتو
- سجمي .. عادل دة منو
- عادل الواحد دة ولد عمو محمد
خالدة اتصدمت شديد ومشت تبكي حضنت بتها .. شديد وبقت تكورك لمة الدنيا كلها .. الاسرة كلها جات
- وااي عادل خطف بتي وكان عاوز يعتدي عليها ..
اهل عادل طبعا ما رضو بالذات امو بقت تتشاكل مع خالدة
- انت عارفة نفسك بتقولي في شنو .. ولدي انا ما عندو شغلة بي البنت دي .. ولدي راجل وسيد الرجال محترم ومكمل الاحترام ..
- قلت ليك ولد خطفها .. واسي مسجون يختي ولدك في السجن اجري الحقي بدل تقعدي تكذبي فيني انا وبتي .. قال محترم قال
- لا صدمتيني .. تتهمي ولدي عشان بت غريبة ما عارفين اهلها وفصلها واصلها ..
طوالي امو جرت هي وابوهو ووراجل خالدة . والجد وكلهم .
نجوان من كلام مرت عمها .. حست انو مهما كانت قاعدة معاهم سنين وربوها وعملو ليها اي شي ما بتقبلوها بينهم كانو بعاملوها معاملة الضيف القاعد في البيت حست روحها ضايعة بس امها خالدة دي البتحبها وعاوزاها واشترت ليها العربية ..وعملت ليها كل حاجة .. نجوان قعدت تبكي دخلت غرفتها زعلت نامت
تاني يوم الصباح قامت بتفتش في الدولاب علي صورة قديمة كانت شايلاها وقت جات البيت دة .. هي نفس للصورة العند وجدان صورتهم الاثنين .. بقت تعاين ليها وتتأمل فيها فتحت شنطة جامعتها دخلتها فيها .. جات ترجع الحاجات النزلتها من الدولاب شالت ليها ملف عاوزة ترجعو وقعت منها صورة .. شالتها عاوزة ترجعها انتبهت للصورة فيها امها قاعدة في الكرسي وشايلة شافعة صغيرة عمرها 3 سنة او 4 كدة في الحدود دي .. استغربت وقالت
- دي بت منو ياربي .. مستحيل تكون عناب بت عمو محمد
عشان اتولدت برا وجو قريب .. نجوان شالت الصورة ومشت لي امها قالت ليها
- يمة انت البنت دي منو الفي الصورة دي .
امها لما شافت الصورة توترت شديد وحاولت تطلع من الموضوع
- دي ..د دي
لما مالقت طريقة خطفت الصورة من يد نجوان وبقت تكورك فيها
- جيبي الصورة دي هنا انت بتفتشي في حاجات ما بتخصك مالك ؟
مش عندك جامعة امشي استحمي واللبسي واطلعي جامعتك يلا .
نجوان بقت فاتحة عيونها وتعاين في امها استغربت من ردت فعلها دي وبدت تشك انو في حاجة غريبة ودي منو الفي الصورة دي ..
قامت مشت لبست وطلعت جامعتها ...
حضرت المحاضرة وقعدت برا اتلفتت يمين وشمال امكن يكون وجدان واية جو بس ما لقتهم ..
☆☆☆
وجدان واية الليلة ما طلعو من البيت نهاائي خافو من يوم امس لأنو حسو انو ابوهم بدأ يشك فيهم .. بعد فطرو اية قالت لي وجدان
- يابت تتذكري سألتيني من رقم مؤيد .
- اااي صح اها عملتي فيه شنو..
- جبتو ليك بس انت ما فهمتيني عاوزة تعملي شنو .
- عاوزة اوريه حدودو العولاق عشان تاني يلعب بي اختي وتعالي عندي ليك خطة مناسبة .
- يختي عقلك الايام دي شغال كويس اها يلا قولي ..
- كيف دة كلامك .. المهم انت حا تقومي تتصلي عليه . وتقولي ليه انك اية وحابة تلاقيه وكدة اعملي الكلام البقولو ليك وبعدين خطوة خطوة .
- يابت دة كلام شنو دة
- اعملي بس ..
اية اتصلت بي مؤيد وقالت ليه نفس كلام وجدان القالتو ليها واتفقت انو يتلاقو في شارع النيل .. بعد نص ساعة
ااية جهزت سريع سريع وعملت ميكب اب وطلعو هي وجدان مشو شارع النيل وجدان كالعادة قاعدة بين الشجر اية مشت قعدت في طربيزة فيها كرسيين .. مستنين مؤيد يجي .
يلا اية قعدت في كرسي مخالفة وجدان يعني وجدان في ضهرها .. لما جا مؤيد قعد في كرسي ظاهر لي وجدان بقت شايفة وشو
اية لما كانت بتحب مؤيد بقول ليها ست البنات نظام حنك وكدة ..
بس وجدان طلعت تلفونها وقت تصور فيديو طبعا وش اية ما ظاهر بس ظاهر انو قاعد مع بت لكن ما معروفة منو . واية فاتحة تلفونها تسجيل صوت وخاتاهو في شنطتها
مؤيد سلم على اية وقام نادى شافع صغير رسلو يجيب ليه بارد 2
- كيفك يا ست البنات اخبارك
- الحمدلله تمام كيفك انت
- الحمدلله الليلة القمر اتذكرنا كيف
- والله القمر عمرو مانساك ... بفكر فيك دايما ..
قعد يضحك والغمازات ظهرن .. اية من جواها بتقول ليه يا حقير الله لا كسبك .
- والله وانا كمان ما نسيتك طوالي بفكر فيك .. الحمدلله بس اها جديدك شنو ارتبطي ولا لسة سنقل زيي كدة .
- لا ما ارتبطت وانت معقول ما ارتبطت للأن .
- لالا ما ارتبطت .. مافي بت جات حلت مكانك ولا اظن في يا سات البنات
اية من جواها تغلي كان نفسها تشيل الطربيزة وتطبعها علي وشو
- انا اتأخرت والله .. خالتي قاعدة معاي وانا قلت ليها طالعة نص ساعة وبجي .
- خلاص تمام نكون علي تواصل .
بعد ركب عربيتو ومشي واتأكدو تماما انو مشى كل واحدة حفظت الفي تلفونها ومشو ركبو .
وصلو البيت دخلو غرفتهم يسمعو في التسجيل العملتو اية ..
اية قالت في غيظ شديد
- ااااخ الحقييير الواطي ..
- اقسم بالله اكعب من كدة كمان .. ست البنات دي منو ..
- ما هو الفقر بدي كل بت لقب يحنكا بيه مسميني ست البنات .
- خير ما فعل كدة نجوان ذاتو ما حا تعرف انو كان قاعد معاك انت .
اااية في غضب فتحت غطى تلفونها وطلعت الشريحة فتفتتها حتة حتة عشان تاني ما يتصل بيها .. وجدان قالت ليها
- احسن حاجة عملتيها .. ما يكون عارفك ساكنة وين
- لالا ما بقدر يصلني تاني.. ماعارف اي معلومة عني ..
- خلاص تمام ..
☆☆☆
نجوان قعدت لما زهجت ما جو .. دورت عربيتها ومشت البيت لقت البيت يقلب ويعدل في موضوع عادل ..
طوالي ولا ادتهم وشها مشت الغرفة جات امها لاحقاها ..
- الكلب دة اتسجن فترة لحد ما يحاكمو ..
- حصل شنو جديد
- الاثنين المعاهو اعترفو عليه .. الكلب العواليق .
- ااي يستاهل يتسجن .. براهو جابها على روحو .. لكن ما تعملو محكمة وكدة انا ما ناقصة يمة كل مرة ينادوني .. راسي براهو واجعني والفيني مكفيني .. بعدين انتو لو عملتو محكمة بتخربو علاقة الاخوان بي بعضهم عشان كدة بلاها ..
- وهي بقت فيها علاقة بعد العملو دة ... تاني مافي اي علاقة بتربطني بيهم ..
امها طلعت من الغرفة نجوان رقدت في السرير عاوزة تنوم اتذكرت موضوع الصورة .. وبقت تفكر وتقول
- موضوع البنت دي لو كان موضوع عادي كان امي ورتني بيه ..
ياخ هي حتى لما شافت الصورة اتلبكت واتوترت . ولونها اتخطف . في شنو ياربي والبنت دي منووو ؟
☆☆☆
في اليوم البعدو اللي هو الخميس كالعادة اية وجدان طلعو بعد ابوهم طلع مشو الجامعة استنو نجوان بعد طلعت من محاضراتها .. نادوها قامت جاتهم ..
- اهلين .. وين انتو امبارح استنيتكم ما جيتو
ردت وجدان ..
- ااي والله امبارح ماقدرنا نطلع من البيت
- ما مشكلة .. كنت عاوزة اوريكم الحاجة دي دقيقة بس .
فتحت شنطتها طلعت الدفتر .. جواهو الصورة .. وجدان اول ما شافتها ختت يدها في خشمها اتفاجأت .. وعيونها بدت تدمع ..
- انت كمان عندك زيها ..
- ااي والله محتفظة بيها .
وجدان طلعت الصورة حقتها برضو ورتها لي نجوان .. بعد شوية نجوان قالت
- حبيبي مؤيد جاي بعد شوية عاوزة اعرفكم بيه ..
وجدان طوالي نطت في الموضوع
- الحمدلله انو فتحتي الموضوع براك .. عايني والله الولد لا بحبك ولا شي مش الشفتو اليوم داك ؟ .. ما اظن
نجوان اتضايقت من كلامها شديد ...
- وجدان .. والله مؤيد زول كويس وقال حا يجي البيت يتقدم .. صح لسة ما كلمت اهلي بس حا اكلمهم قريب..
اية قالت ليها
- والله ويا نجوان كلام وجدان صح الزول دة ما كويس واحنا بنعرفو حق المعرفة ..
اضايقت شديد وشها بقي ما بتفسر .. وقالت ليهم في حرقة
- عاينو بس ارجوووكم ما تدخلو في حياتي بالطريقة دي
وجدان عاينت لي اية واشرت عليها نظام اسكتي .. خليها
سكتت مسافة وقالت ليهم
- بتعرفو عنو شنو ..
وجدان عاينت لي اية بطرف عينها ومعاها ابتسامة خبيثة كدة نظام نفس تصرفاتي .. قالت ليها ..
- ما كويس عديل مربط مع سبعمية بت في نفس الوقت
وانتي ممكن تتأكدي من الكلام دة .
- كيف ؟
- قولي ليه امبارح شفتك قاعد مع بت لابس احمر اسمها ست البنات .. في شارع النيل الساعة 12 م واحنا بننتظرك هنا
قالت ليهم في خوف
- خلاص تمام
بعد فاتت اية قالت لي وجدان
- ما حا تستفيدي حاجة غير انو حا يطلعنا كذابات قدام نجوان الزول دة نصاب ومكار شديد
- والفيديو العندنا بعمل في شنو ..
نجوان مشت لي مؤيد .. جاها في نفس المكان الفات .. قالت ليه
- كيفك يا مؤيد اخبارك
- الحمدلله تمام يا عمري كيفك انت ..
- بخير والله جديدك شنووو .. واخبارك امبارح طبعا ما قدرت ارد عليك كنت مع امي وبعدين نمت
- لا عادي حبيبتي اصلا امبارح كنت من الضباح مدروش في الشركة وقعدت للعصر ومشيت البيت تعبان نمت طوالي
- اممم والنسبة للبنت اللابس احمر الكنت قاعد معاها في شارع ... النيل ..
- ابدا ولا حصل .. كمان جابت ليها شك يا حبي .. لالا زعلتيني
- اوووه معليش حبيبي .. بالجد اسفة ما قصدي .. طيب دقيقة اجيب شنطتي واجي
نجوان استأذنت منو عشات تجي لي وجدان واية .. قالت ليهم
- انا قلت ليكم .. مؤيد مستحيل يكون كدة بتكونو شبهتو ساي ..
- اية شغلي الفيديو ..
اية شغلت الفيديو وورتو لي نجوان .. وجدان قالت ليها ..
- اها كمان قولي لينا بنكذب ..
نجوان بعد حضرت الفيديو .. بقت واقفة وماسكة التلفون حتى بعد الفيديو انتهى غلبها تتكلم وتنطق بكلمة .. وجدان قالت ليها ..
- نجوان انا والله لا عاوزة ازعلك ولا حاجة بس انتى اختي وانا ما عاوزة ليك الا الخير .. بالجد لما عرفت الولد دة ما كويس ما هان علي ..
- دقيقة اسي بجي ...
نجوان مشت ليه ممكونة وزعلانة والعبرة خانقاها .. قال ليها
- اشتقت ليك يا حبي
نجوان شالت يدها فوق وكف علي وشو لما طش شبكة .. قام مخلوع مسك خدو بي يدو .. وبقي منطط عيونو وبعاين ليها .
قالت ليه بحرقة
- يا حقير يا كلب تلعب على منو انت يا واطي .. الليلة وطاتك اصبحت والله امسح بيك ارض الجامعة دي كلها ..
- في شنو يا حبي مالك فجأة كدة .
- تحبك الشكلوتة .. ان شاءالله ما تقول لي حبيبتي تاني .. يافقر .. بعد من خلقتي عشان ما تعولق معاك اسي دي .
مؤيد طوالي مشى خلاها دور عربيتو وطلع اية ووجدان جوها جارين .. وجدان مسكت اختها من كتفها .. نجوان قعدت تبكي وحضتها .. تبكي وتقول
- انا بالجد آسفة يا وجدان .. بالجد انا اسفة علي كل العملتو معاكم
والله انا ما قصدي اعمل كدة ولا قصدي اعاملكم كعب.. بالجد انا زعلانة من نفسي شديد والله ..
وجدان تطبطب عليها في ضهرها وبتقول ليها
- انا مستحيل ازعل منك حبيبتي مستحيل من سابع المستحيلات ..
نجوان مستمرة في البكاء بعد شوية فكت وجدان مشت حضنت اية وليها حق تعتذر منها لأنها كانت بتسىء لي اية كتير .. بس اية قلبها ابيض وصافي زي اللبن ما كانت بتاخد علي خاطرها منها وكانت زولة متفهمة .. سامحتها وقبلت اعنذارها ..
دفعت نجوان كلهم لاحظو ليها بتبكي جو وقفو اتفاجئو ب وجدان وبقو يتكلمو كلام كتير كلو اتنين اوتلاتة واقفين يقطعو مع بعض مافي واحد قادر يسأل دي منو لأنو اصلا كانت سافهاهم سفه السنين ..
جات صحبتا من شدة الخلعة سألتها بصوت عالي ..
- وااااي يا جوان دي منووووووو .. ووووب علي عايني ليه نسخك منك كيف ..
وجدان اتحسست من دفعتها عشان عارفين انو هي واحدة عند اهلها .. نجوان مسكت وجدان من يدها وقالت ليهم بثقة شديدة وصوت عالي ..
- عارفاكم مستغربين شديد دي منو البتشبهني دي بس انا حا اقول ليكم دي منو .. دي اختي التوأم وجدان . ودي اختنا اية
وجدان اتكيفت شديد من تصرف اختها واقتنعت خلاص انو اتقبلتها وبقت تحبها زي ما هي بتحبها بالضبط
وجدان ونجوان واية طلعو طلعو شارع النيل مشو قعدو هناك اتونسو كملو الونسة ورجعو البيت وجدان شالت رقم نجوان ومشو رجعو البيت .. لقو جارتهم في البيت هناك اسمها نعمة.. وجدان
قالت
- سلام عليكم
- وعليكم السلام .. جاين من الجامعة ولا شنو .
ردت عليها اية .. بأنفعال شديد وغير متوقع
- انت مالك انت بتدخلي في حاجة ما بتخصك وبعدين جاية هنا تعملي شنو ؟
وجدان بقت منططة عيونها ومصدومة من الاسلوب الاتكلمت بيه ايه مع جارتها بس ما قالت حاجة كمان المرة سكتت وفاتت بعد دخلو وجدان طبعا الفضول اكل قلبها شديد طوالي سألتها .
- اية ؟ طبعا ما عرفتك عديل.. دي منو يختي وليه بتتكلمي معاها كدة ؟ .
- المرة دي عولاق ساي وبايرة ليها سنين خاتة عينها في ابوي الما بتختشي ابوي قال لي كانت اعز صحبات امي وهي فاكرة انو حا يعرسها بعد امي ماتت ..
وجدان فكت ليك ضحة من اعماق قلبها ومسافة طويلة وبصوت عالي ومعاها نطيط وصفيق بي كلووو .
- لالا عاد بالغتي بالغتي شديد .
اية عاينت ليها كدة وهي بتضحك ضحكت معاها ومشت علي البلكونة زحت الستاير لمحت نعمة واقفة معاهو .. وجدان لحقتا لقو الخال عثمان واقف معاها .. اية قالت في غيظ .
- شفتي الحية دي .. طوالي بتعمل كدة .. خفيفة خفة السنين انت عارفة لو كانت تقيلة ولازمة بيتها انا كان قلت لي ابوي عرسا عشان هي صحبة ماما .. بس دي ما صدقت انو ماما ماتت طوالي مسكت فيه .. وجدان قالت ليها بهظار
- يابت خليهم حلوين مع بعض .. خليهم وتعالي داخلة ..
فجأة لاحظة اية انو ابوها ملامحو اتغيرت كلو كلو ..
جا دق جرس الباب الجرس من اشتغل ما وقف لحد ما اية ووجدان نزلو فتحو الباب .. اول ما
فتحو بقي جايط فيهم من شدة الجوطة بقي يتكلم بكلمات ما مفهومة .. اية في رعب سألتو لأنو ما متوقعه
منو ردت الفعل القوية دي
- بابا في شنو انا مافاهمة حاجة عليك الله ورينا ..
ابوها سكت مسااافة ودخل جوا قعد في الكرسي بقي بعاين ليهم في غضب الاثنين .. وكأنو عيونو دي بتطلع شرار .. فجأة سكت سكتة
كدة ما مفهومة .. دة البسمو هدوء ما قبل العاصفة ..
فجأة سألهم وبدون مقدمات .. بغضب وصوت عالي
- انتو قاعدين تمشوووو وين كل يوم .. بتطلعو من البيت بعد امشي وبتجو قبل ما اجي بتمشو ويييي؟
Alaa Sami
الرئيسية
